Түркістан облысы Жетісай қаласында күйеуі әйелін балаларының көзінше ұрып өлтірді. Қазір күдікті қамауға алынған. Айта кетсек, екі ай бұрын Ордабасы ауданында ер кісі төрт баласының көзінше келіншегін ұрып өлтірген еді. 15 жыл отандасқан күйеуінің қолынан азаппен өлген әйелдің туыстары күйеу балалары ішімдік мен есірткіге тәуелді болғанын айтқан еді. Қоғамда резонанс туғызған оқиғалар өңірде неге жиіліп кетті?
Жантүршігерлік оқиғаны алғашқылардың бірі болып журналист Гүлмира Әбіқай Instagram парақшасына жариялады. Оның мәліметінше, оқиға балаларының көзінше болған. Шартты түрде сотталған күйеуі, нашаға еліріп ес жоғалтқан. Сүйтіп марқұмды өлімші етіп сабап, өзі ұйықтап қалыпты. Ауруханаға түсіп, комада жатқан келіншек есін жимастан көз жұмған. Оқиғаға қатысты Түркістан облыстық ПД Баспасөз қызметі ресми пікір білдірді.
ГҮЛНАР ӘБДІРАХМАНҚЫЗЫ, ТҮРКІСТАН ОБЛЫСЫ ПОЛИЦИЯ ДЕПАРАТАМЕНТІ БАСПАСӨЗ ҚЫЗМЕТІНІҢ БАСШЫСЫ:
— Оқиға орнына бірден тәртіп сақшылары аттанды. Олар тиісті тексеру жұмыстарының барлығын жүргізді. Аталған жайтты ҚР ҚК 106-бабы 1-бөлігімен тіркеді. Ал 14-маусым күні күдікті ол әйелдің күйеуі ілініп, ұсталынып, қамауға алынды. Оқиғаның толық мән-жайы тергеу барысында анықталатын болады.
Ал әлеуметтанушы Нұрбол Байбақовтың айтуынша тұрмыстық зорлық-зомбылық елімізде жыл санап артып келеді. Күш қолдану, психологиялық қысым көрсету көбіне ішімдіктің салдарынан болады дейді ол.
НҰРБОЛ БАЙБАХОВ, ӘЛЕУМЕТТАНУШЫ:
— Статистиканы қарап отырсақ, көптеген зорлық-зомбылықтар ішімдіктің салдырынан болады. Ішімдікке адам қалай барады. Тағы да әлеуметтік мәселелерден. Кредит төлей алмау. Жұмыссыздық. Отбасындағы кикілжіңдер. Ішімдік ішкен адам отбасына зорлық-зомбылық жасауы мүмкін. Зорлық-зомбылықтың арты қайғылы оқиғаға алып келуі мүмкін. Бір фактор екінші факторды тудырады.
Сондай-ақ, маманның айтуынша бұл мәселемен тек құзырлы органдар мен БАҚ өкілдері ғана емес, қоғам болып күресу керек. Отандық сарапшылардың мәліметінше, Түркістан облысы тұрғындарының 57 пайызы тұрмыстық зорлық-зомбылық үшін жауапкершіліктің бар екендігінен хабарсыз. Ал БҰҰ-ның мәліметінше әлемдегі әр 3-ші әйел тұрмыстық зорлық-зомбылықтың құрбаны болады екен. Алайда олардың тек 40 пайызы ғана көмек сұрайды.
РЕДАКЦИЯНЫҢ МЕКЕНЖАЙЫ:
