Бейжіңде (ҚХР) ШЫҰ-ның Медициналық және фармацевтикалық ынтымақтастықты дамыту жөніндегі конференциясы өтіп жатыр. Конференция кезінде елімізде дәрілік заттарды тіркеу үшін қандай талаптар қойылатыны айтылды, деп хабарлайды Turkistanzaman Baq.kz сілтеме жасап.
Іс-шараға Қазақстан Республикасы Денсаулық сақтау министрлігі Дәрілік заттарды сараптау департаментінің басшысы Шынар Байдуллаева онлайн форматта қатысты.
Ол өз сөзінде конференцияның ұйымдастырушылары — ШЫҰ-ның тату көршілік, достық және ынтымақтастық жөніндегі Қытай комитеті, ШЫҰ-ның Хатшылығы және ҚХР-дағы Өзбекстан Республикасының елшілігіне алғысын айтты.
Шынар Байдуллаева конференцияға қатысушылардың назарына еліміздегі дәрілік заттардың қолжетімділігін реттеу мәселелері жайында ақпарат ұсынды.
Бұл мәселе, өздеріңіз білетіндей, Денсаулық сақтау министрлігінің қарамағында. Денсаулық сақтау министрлігі құрылымында Медициналық-фармацевтикалық бақылау комитеті жұмыс істейді. Бұл — мемлекеттік орган және ол дәрілік заттар мен медициналық бұйымдар мәселелеріне жауап береді, — деді Дәрілік заттарды сараптау департаментінің басшысы конференцияда.
Ол атап өткендей, комитеттің құрамында Дәрілік заттар мен медициналық бұйымдарды сараптау ұлттық орталығы бар. Оның негізгі міндеті — Қазақстан нарығына келетін барлық дәрілік зат пен медициналық бұйымды сараптау, тіркеу.
Денсаулық сақтау министрлігі Дәрілік заттарды сараптау департаментінің басшысы Шынар Байдуллаева елімізде дәрілік заттарды тіркеуге қойылатын талаптарға тоқталды.
Қазақстанда тіркеу іс-шараларын жүргізу үшін Дәрілік заттар мен медициналық бұйымдарды сараптау ұлттық орталығына онлайн өтініш беруге болады. Тіркеу жұмыстарының белгіленген уақыты бар. Сондай-ақ сараптама жұмыстарының уақыты — 210 күнтізбелік күн. Одан бөлек, ДДҰ-да қайта квалификациядан өткен дәрілік заттардың сараптама жұмысын қысқарту да қарастырылған. ҚР Денсаулық сақтау министрлігі ДДҰ-да қайта квалификациядан өту рәсіміне қатысады. Сонымен қатар бірқатар ел үшін зертханалық сынақтар мерзімін қысқарту белгіленген, — деп түсіндірді ҚР Денсаулық сақтау министрлігі өкілі.
Оның айтуынша, Қазақстан нарығына кірудің негізгі талаптарының бірі – тіркеу куәліктерінің иелеріне фармацевтикалық қадағалауды жүзеге асыратын жергілікті тұлғаның болу талабы. Сондай-ақ бұл тұлға Қазақстан аумағында болуы керек. Онымен қоса барлық байланыс дерегі тек қазақстандық болуға ттіс. Бұл біздің тұтынушылардың, пациенттердің медициналық өнімдер туралы ақпаратқа қол жеткізу құқықтарын қамтамасыз ету үшін маңызды.
Яғни дәрілік заттарды тіркеуге дейін GP инспекция жүргізіледі. Дәрілік заттарды тіркеу кезінде GP инспекцияның басқа түрі де өткізілуі мүмкін, — деп айтты Шынар Байдуллаева.
РЕДАКЦИЯНЫҢ МЕКЕНЖАЙЫ:
