Жыл басынан бері «Kids go free» бағдарламасымен 1200 бала ғана әуе сапарларын тегін пайдалана алған. Туризм саласындағы көлік мәселелері жөнінде Мәжіліс депутаты Елнұр Бейсенбаев ҚР Премьер-Министрі Әлихан Смайыловқа сауал жолдады, деп хабарлайды ҚазАқпарат.
«Еліміздегі туристік саланың жүйелі дамып, оның экономикалық оң әсерін күткелі біраз жылдың жүзі болды. Әр уақытта Қазақстандағы туризмнің тұрақты дамуына кедергі келтіретін мәселелер мен қиындықтар туындап отыратыны бар. Мысалы, турист болса – маршрут жоқ, маршрут бар да – инфрақұрылым жоқ, инфрақұрылым болса – ұсынатын өнім жоқ. Біреуі болса, біреуі жоқ, шамасы бұл салада жүйелі жұмыс жоқ», — деді депутат Мәжілістің жалпы отырысында.
Е. Бейсенбаев пандемия аяқталып, ішкі туризмге қызығатын, төлем мүмкіндігі бар туристердің саны артқанын атап өтті.
«Оған қоса сапалы, әрі тарихи туристік нысандар мен киелі орындардың саны артып, олардың жан-жақты жарнамалануын байқап отырмыз. Бұл сала үшін аталған жағдайды «сәтті туристік уақыт» деп айтуға келеді. Бірақ, адам қалағанымен транспорттық жүйе реттелмеуінен еліміздің барлық табиғи сұлулығына жету мүмкін емес болып шықты. Оның ішінде әуе сапарлары бойынша ең көп шағым келіп түсуде. Ұшу жиілігінің төмендігі, реттеуге келмейтін түсініксіз әуе билеттерінің баға мәселесі, қызмет көрсету сапасы мен рейстерді негізсіз кешіктіру сияқты мәселелерді тізіп кете беруге болады. Оған қоса, әуе компанияларымен турпакеттер бойынша келіссөздер жүргізу мүмкін еместігін турагенттіктер жиі көтереді», — деді Е. Бейсенбаев.
Депутат әуе жолдарына қоса, теміржол мәселесі де өзекті екенін жеткізді.
«Қазақстан теміржолының туристік бағыттарды дамытуға қауқары да, ниеті де жоқ сияқты көрінеді. Бұл компания елдегі монополист бола тұра, өзінің басты бағытын жүк тасымалдауға арнаған. Ал, халық қолданатын вагондардың сапасы нашар, интермодальды тасымалдау тәжірибесі жоқ, туристік кластағы пойыздар туралы айтпай-ақ қоялық. Еуропаны айтпағанда, Орталық Азия және өзге жекелеген мемлекеттермен байланыстыратын халықаралық туристік жүйені қалыптастыра алмадық. Соның кесірінен Жібек жолы бойындағы теміржол маршруттарының орнын көршілес Өзбекстан өз стиліндегі жайлы вагондарымен туристік кластер ретінде іске асырып отыр», — деді ол.
Үшіншіден, автокөлікпен жүретін жолдардың жағдайы сын көтермейтіні туралы депутаттық сауалдар жетерлік.
«Тіпті Мемлекет басшы бұл мәселені шешетін уақыт жетті деп Үкіметті сүйрелеп жүргенін білеміз. Бір ғана мысал, еліміз бойынша ең кемі 4 мың шақырымнан асатын 166 бағыт бойынша автожолдарды жөндеу мен реконструкциялау қажеттігі анықталған. Жыл басында депутаттардың табанды қолдауымен туризм саласын дамытуға оң әсер беретін бірнеше жаңа ұсыныс енгізілген еді. Бірақ, бұл мәселеде де бюрократиялық шырмаулар көбейіп, «Kids go free» бағдарламасымен 10 айда небәрі 1200 бала ғана әуе сапарларын тегін пайдалана алған, жоспар бойынша кемінде 100 мың баланы қамтимыз деп еді. Баланың ұшу билеті қайтарылады дегеніміз қайда? Бағдарламаның тиімсіздігі елдің Үкіметке деген жаппай сенімсіздігін туындататыны анық емес пе», — деді Е. Бейсенбаев.
Бұған дейін депутат Қазақстандағы ұшақ рейстерінің жиі кешігуі мәселесін көтерген еді.
РЕДАКЦИЯНЫҢ МЕКЕНЖАЙЫ:
