Түркістан облысында заңсыз айналымнан 7 тоннаға жуық жанармай өнімдері тәркіленді, деп хабарлайды ҚазАқпарат.
Түркістан облысы полиция департаменті мен ұйымдасқан қылмысқа қарсы күрес басқармасы қызметкерлері кенттердің бірінде жанар-жағармай материалдарын заңсыз сатумен айналысқан жергілікті тұрғынды анықтады. Полицейлер күдікті әйелдің дүкен қоймасынан түрлі контейнерлерге құйылған шамамен 500 литр бензин мен резеңке шлангты айғақты зат ретінде тәркіледі.
Сондай-ақ жедел уәкілдер Сарыағаш ауданында орналасқан қараусыз қалған жанар-жағармай бекетінде мұнай өнімдерін тиісті құжаттарсыз заңсыз сақтау және сату дерегін тіркеді. Жергілікті тұрғыннан тәртіп сақшылары 5 тонна дизель отыны бар цистерна тәркіледі.
Жанар-жағармай материалдарын заңсыз сатудың деректері Созақ, Түлкібас және Келес аудандарында да тіркелді.
«Отын-Энергетика» жедел-профилактикалық шарасы аясында ҚР ҚК-нің 197-бабы 1-бөлігі «Мұнай мен мұнай өнімдерін тасымалдау, сатып алу, өткізу, сақтау, сондай-ақ олардың шығу тегінің заңдылығын растайтын құжаттарсыз мұнайды қайта өңдеу» бойынша 6 жайтты тіркеді. Заңсыз айналымнан 7 тоннаға жуық жанар-жағармай, оның ішінде дизель мен бензин алды. Қазіргі таңда барлық анықталған жайттар бойынша сотқа дейінгі тергеу амалдары жүргізілуде»-делінген Түркістан облысы полиция департаментінің баспасөз қызметі таратқан ақпаратта.
РЕДАКЦИЯНЫҢ МЕКЕНЖАЙЫ:
