«Алдағы 3 жылда халық 100% таза ауызсумен қамтылуы керек!». Премьер-министр Әлихан Смайылов үкімет отырысында осындай тапсырма берді. Өйткені мың жарымнан астам ауыл жұрты әлі күнге дейін сапалы суға жарымай отыр.Әсіресе, бұл мәселе Түркістан облысында өзекті. Аймақта 30 ауылда су тарту үшін барлау жұмыстары жүргізілмеген. Ауылдық елді мекендерде ауызсумен қамтудың ең төменгі деңгейі Қостанай және Солтүстік Қазақстан облыстарында сақталған. Қалалық жерді сумен жабдықтау қызметі Жамбыл облысында да көңіл көншітпейді екен.
«Халықтың таза су іше алмай жүруіне әкімдер кінәлі». Осылай деген Премьер-министр аудан басшылары іздестіру-барлау жұмыстарын жүргізу керек дейді. Үкімет отырысында қордаланған мәселені аяқсыз қалмауын шегелеп айтты. Аталған жобаларды қаржыландыруға басымдық берілмек. Олардың басым бөлігі жаңадан іске қосылатын объектілерді автоматтандыруға жұмсалады. Бұл инновациялық технологияларды енгізуге тиімді дейді Алихан Смайылов
Әлихан Смайылов – ҚР Премьер-министрі:
«Ауыз су мәселесі тұрғындар үшін өте өзекті. Сондықтан әрбір шешім уақытылы қабылданып, нәтижелі болу керек. Тұрғындарды сумен қамтамасыз ету жөніндегі өңірлік саясатты іске асыру барысында Түркістан, Батыс Қазақстан, Жамбыл және Қарағанды облыстарының әкімдіктері 2023 жылы іздестіру-барлау жұмыстары мен жобалық-сметалық құжаттарды дайындауды аяқтауы қажет. Мұның барлығы елдімекендерді сумен қамтамасыз ету жөніндегі жоспарланған көрсеткіштерді сапалы орындауға мүмкіндік береді».
Ал, Индустрия және инфрақұрылымдық даму министрі бұл үшін 215 млрд теңге сұрап отыр. Оның ішіне ескірген су желісін жаңарту жобасы да кіреді.
Қайырбек Өскенбаев – ҚР Индустрия және инфрақұрылымдық даму министрі:
«Сумен қамтамасыз ету деңгейін арттыру үшін көрсеткіштері төмен және көш соңында қалған өңірлерге басым негізде қаражат бөлінеді. Осы жылы бұл мақсаттарға нақтылауды ескере отырып, республикалық бюджеттен 215 млрд теңге көзделген. Оның ішінде қалаларда – 120 млрд теңге және ауылдық елді мекендерде — 95 млрд теңге. Бұл жыл қорытындысында қала халқының 98,5 пайызын, ал ауыл халқының 94,7 пайызын сумен жабдықтау қызметтерімен қамтамасыз етуге мүмкіндік береді»
Еліміз бойынша барлығы 6 302 ауылдық елді мекен бар, оның ішінде 4 759-ы сумен қамтылған. 511 ауылға орталықтандырылған су жүйесімен жабдықтау жөніндегі құрылыс жұмыстарын жалғастыру жоспарланып отыр. Ал халық саны аз бір мыңнан астам ауылда жергілікті бюджет қаражаты есебінен кешенді блок-модульдер орнатылады.
РЕДАКЦИЯНЫҢ МЕКЕНЖАЙЫ:
