Ел президенті Қасым-Жомарт Тоқаев алғаш рет мемлекеттік сапармен Түркия республикасына барды. Режеп Тайып Ердоғанмен шағын және кеңейтілген құрамда келіссөздер жүргізіп, бас-аяғы 14 құжатқа қол қойылды. Бауырлас елдер сауда-саттықты бірнеше есе көбейтуге уағдаласты. Айта кетерлігі, Алтайдан басталған қазақ көшінің қасиетті Анадолы топырағына жеткеніне биыл 70 жыл толды. Ал Қазақстан мен Түркия арасында дипломатия орнағанына биыл 30 жыл.
Қазақстан президентін «Эсенбоға» әуежайынан Түркия вице-президенті Фуат Октай мен осы елдің басқа да лауазымды тұлғалары күтіп алды. Бұл жолы қазақ делегациясы Анкараға кең құрамда келді. Сәлемдесу рәсімінде Ердоған министрлермен мұқият тілдесіп, пікір алмасты. Тіпті Бағдат Мусиннің келбетіне таң қалып, министрдің жасын сұраған.
Мемлекет басшысының сапары тарихи орыннан басталды. Анкараның қақ ортасында орналасқан Анытқабір барша түріктердің қастер тұтар орны. Мұнда Түркияның негізін қалаушы әрі тұңғыш Президенті Ататүріктің сүйегі жатыр. Қасым-Жомарт Тоқаев Мемлекеттік сапарын біртуар тұлғаның рухына тағзым етуден бастады.
Сапар барысында Қасым-Жомарт Тоқаев әріптесі Режеп Тайып Ердоғанмен шағын және кеңейтілген құрамда келіссөз жүргізді. Мемлекет басшысы Түркияны Еуразия құрлығындағы ең маңызды әрі сенімді серіктесі санайтынын айтты.
Қасым-Жомарт Тоқаев – ҚР президенті:
«Бұл сапар саяси сауда экономикалық инвестициялық мәдени-гуманитарлық әскери техникалық және басқа да салалардағы ынтымақтастықты одан ары нығайтуға мүмкіндік береді. Әсіресе транс каспий халықаралық көлік бағдарының әлеуетін толқы пайдалануға екі елде мүдделі. Геосаяси ахуал ушығуға түскен мұның мән маңызы айрықша. Біз қазақ-түрік ынтымақтастығын жаңа деңгейге көтеру үшін кеңейттілген стратегиялық кеңістіктер туралы бірлескен мәлімдеме қабылдадық».
Әлемде геосаяси ахуал ушығып тұр. Ресей мен Украина арасындағы соғыс мемлекетіміздің экономикасына салқынын тигізіп жатыр. Осы ретте Реджеп Тайып Ердоған қазақ пен түріктің аспаны ашық болуы үшін әрдайым жәрдем беруге әзір екенін жеткізді.
Реджеп Тайып Ердоған — Түркия республикасының президенті:
«Біз әріптестігімізді кеңейтілген стратегиялық серіктестік деңгейіне көтердік. Түркия мен Қазақстан – ортақ тарих, тіл, дін және мәдени құндылықтардан қуат алған әрі мықты байланыс орнатқан бауырлас мемлекеттер. Біз Түркия елі Қазақстанның тұрақтылығы мен тыныштығына ерекше көңіл бөлеміз. Сіздің Жаңа Қазақстанды құру жолындағы күш-жігеріңіз бен табандылығыңызды құрметтеймін. Осы бағыттағы ауқымды реформаларыңызды қолдаймын»
Ресми шаралардан кейін Қазақстан мен Түркия президенттері үстел теннисін де ойнады. Бұл кездесу – елеулі саяси оқиға болғандықтан жергілікті ақпарат құралдары сәт сайын хабар таратты. Ал бірінші күннің қорытындысы бойынша тараптар байланысты күшейтуге бағытталған 15 меморандумға қол қойды. Бұдан бөлек президенттер кеңейтілген стратегиялық серіктестік туралы бірлескен мәлімдемеге келді.
РЕДАКЦИЯНЫҢ МЕКЕНЖАЙЫ:
