Ақтауда ата-ана қамқорлығынсыз қалған балалардың жағдайы талқыланды, деп хабарлайды Turkistanzaman ҚазАқпарат сілтеме жасап.
Облыс әкімінің орынбасары Ұлықбек Тінәлиевтің қатысуымен «Отбасы – бала үшін ең жақсы орын» тақырыбында дөңгелек үстел өтті.
Онда Маңғыстау облысындағы әлеуметтік-жетімдік мәселесін шешу жолдары талқыланды. Шараны «Ана үйі» қоғамдық қоры ұйымдастырды.
Жиында сөз сөйлеген Ұлықбек Тінәлиев жетім және ата-ана қамқорлығынсыз қалған балалар мемлекеттік органдар мен ел басшылығының тұрақты бақылауында екенін атап өтті.
— Балаларымыздың жарқын болашағы еліміз үшін өте маңызды. Өкінішке орай, біздің қоғамда ата-аналары болса да, жетім қалған балалар бар. Бүгінгі таңда бұл — басты мәселе. Біздің облыста 456 жетім және ата-ана қамқорлығынсыз қалған бала бар. Оның ішінде 397 бала қорғаншылықта және қамқорлықта, 10 бала патронаттық тәрбиеде, 49 бала интернатта тәрбиеленіп жатыр. Әр бала өз отбасында тәрбиеленіп, отбасылық құндылықтарды сезініп өсуі керек. Бұл бағытта «Ана үйі» қоғамдық қоры үлкен үлес қосып жүр. Сондықтан осы мәселені шешуге бірге атсалысайық, — деп атап өтті Ұлықбек Тінәлиев.
Ақтау қаласындағы «Аналар үйі» ресурстық орталығының 8 жылдық жұмысының арқасында 156 бала балалар үйіне түскен жоқ.
Сонымен қатар қор өмірлік қиын жағдайға тап болған жас босанған аналарға көмек көрсетеді, оларға баспана, медициналық және психологиялық көмек көрсетеді.
Қазіргі уақытта қор еліміз бойынша 6 мыңға жуық анаға қамқорлық жасайды.
Сондай-ақ қор жетім балаларды қазақстандық отбасыларға орналастыру мақсатында «Бала асырап алу» жөніндегі ұлттық агенттік бағытын дамытуды бастады.
«Ана үйі» ҚҚ басшысы Ажаркүл Қылышбаеваның айтуынша, жетім балаларға көмек көрсету, атап айтқанда, сәбилердің балалар үйіне түспеуіне жол бермеу және жетім балалар санын азайту мәселелеріне қоғамның назарын аудару үшін білім беру мекемелерінің, қоғамдық және сараптамалық ұйымдардың бірлесіп жұмыс жасауы аса маңызды.
Жиында аталған мәселе талқыланып, шешу жолдары ұсынылды.
РЕДАКЦИЯНЫҢ МЕКЕНЖАЙЫ:
