Арықтан су ішетін ауыл. Миллиондап ақша бөлінсе де Түркістан облысындағы Ақжол мен Қауыншы елдімекендерінің тұрғындары таза суға қол жеткізе алмай отыр. Былтыр тағы 900 млн. теңге қазынадан қаралған. Бірақ белден қазса да, бір тамшы су шықпай тұрғындардың жанған үміті, су сепкендей қайта басылған.
Өзбекстанмен шекарада орналасқан Ақжол мен Қауыншы ауылдарының күні арықтың суына қарап тұр. Ол су малға да жанға да ортақ. Алайда тұрғындардың өзге таңдауы жоқ. Өйткені елдімекенге таза ауыз су жеткізілмеген. Сапасыз су ішкен соң ауылда ауру-сырқау да көбейген.
Зейнегүл Қожахметова, Алпамыс батыр ауылының тұрғыны:
— Арықтың ішін көрсеңіз қоқыстан көз ашпайсыз. Адам көрмеген нәрсенің барлығы малдың боғы да, қиы да жатыр. Мінекей соның бәрі ағып келеді арықтан, біз соны ішеміз. Ал, больницаға барсаң қазір екінің бірі іш ауру. Қайнымның баласы іші ауырып, тағы түсті больницаға.
Кейбір тұрғындар таза суды сатып алады. Мәселен ауыл азаматы Ержан Сманов қолдан қазып алған құдығына жақында ғана бес тонна су құйдырыпты. Онысы әрі кетсе 10 шақты күнге жетеді екен. Бағасы болса удай.
Ержан Сманов, Алпамыс батыр ауылының тұрғыны:
— Айына қыстыгүні бес тонна су кетеді, ішіп қоямыз бес тоннаны да. Ал, қазір шілдеде екі рет құйдырамыз. Он мың теңге кетеді әшейін қара судың өзіне, он мың теңге кетеді. Кір жуғанға да осыны қолданамыз, ішкенге де қолданамыз. Малға бергенді де осыны қолданамыз.
Жергілікті халықтың ауылдан суы шықпайды дегеніне қарамастан биліктегілер өткен жылы сумен қамтуға 893 миллион теңге бөлген. Тұрғындардың айтқаны айдай келетін сыңайлы, жоспарланған тереңдіктен жеткілікті су шықпапты. Қазір бірлі жарым көшедегі қазылған шұңқырлар ашық шашық күйде қараусыз жатыр.
Гауһар Жораева, Алпамыс батыр ауылының тұрғыны:
— Он жыл бұрын істеген, үкіметтің ақшасы кетті аспанға ұшып. Енді қазір ол кезде жүз қанша миллион болса, қазір 893 млн бөлініп отыр осыған. Бірақ істеген жұмыстарын көрсеңіз адам жылайды. Техникасы жоқ. Грейдерді алты ай шақырды. Қазір бір жылға жуық уақыт өтті.
Салаға жауаптылар бастапқыда су осы жылдың сәуір айында беріледі деп уәде еткен. Алайда енді бұл уәдесінен айнып, жыл соңында жұмысты аяқтаймыз деп отыр. Жоспарланған тереңдіктен су шыға ма жоқ па, ол жағы тағы беймәлім.
Санжар Амангелдиев, Келес аудандық тұрғын үй коммуналдық шаруашылық бөлімінің басшысы:
— Су барлау жұмыстарын жүргізген облыстық оңтүстік облыстық энергетика басқармасы. Ол жерде 100 метр деп берген, мердігер осыған сәйкес қазды 100 метрді. Бірақ судың дебиті аз. Енді екі көлемінде жүргізеді құрылыс жұмыстарын, ары қарай қорытындысын көреміз.
Мердігер суды қажетті көлемде шығару үшін жерді әлі қанша қазатынын да дөп басып айта алмады. Ал таза суға жарымай, таңдайы кепкен тұрғындар жоба он жыл бұрынғыдай тағы аяқсыз қалады ма деп қорқады. Ол кезде де бұрғылау жұмыстары жүргізілгенімен су шықпай, құбырлар қаңсып босқа қалған.
